Podo participar se aínda non teño empresa nin alta de autónomo?

Si. Abonda con achegar, xunto coa proposta, unha declaración responsable da túa intención de constituír unha empresa ou de darte de alta como persoa traballadora autónoma. Non se esixe acreditación formal nesta fase.

A acreditación formal (alta censal, escritura de constitución ou certificación negativa de denominación social) só será esixible á entidade gañadora, con carácter previo ao aboamento da dotación económica, por ser necesaria a emisión da factura correspondente.

Pode presentar a proposta unha persoa autónoma doutro sector, cun equipo técnico detrás?

Si, sempre que a persoa autónoma figure como entidade participante a todos os efectos e asuma as obrigas do punto 8 das bases: a garantía de titularidade e a publicación do código fonte nun prazo de 60 días naturais desde o fallo.

O equipo técnico debe figurar nominalmente no apartado 7 da memoria, e a cesión de dereitos de propiedade intelectual debe estar formalizada antes da presentación.

Quen pode defender a proposta no pitch?

Calquera persoa que figure no equipo do proxecto na memoria técnica, con independencia de que sexa ou non a titular da entidade participante.